بجد ..أروع وأجمل احساس في الدنيا لما تبقى متربي مع حد..وتشهد بنفسك قصة حبه وجوازه ..وبداية معرفتنا بشيماء..اللي غالبا بنقولها "شيكو" كانت بعد معرفتنا بإيمان على طول ..
وميزة الالزون ان اخواتنا كلهم اصحاب ..ومش مجرد اصحاب عاديين .دول بردو شبه اناتيم
يعني شيكو اتصاحبت على اسراء اخت امنية على طول وبقوا هما الاتنين زي الاخوات لانهم دفعة واحدة بردو
واخوات الالزون اخواتنا كلنا .. وعشان كدا احنا دايما مع بعض في المناسبات الحلوة
لان اخواتنا أغلبهم اكبر مننا وبالتالي فأي مناسبة احنا اللي بنحييها ..
واحنا اللي بنبقى موجودين في كل التفاصيل .. يعني أي حد عايز أي حاجة, الإلزون هما اللي يسدوا طبعا
رغم ان ايمان قافشة علينا في فرح شيكو بالذات عشان اتأخرنا عليها في كتب الكتاب .. بس ماتقدرش تنكر اننا بنبقى موجودين
دايما ..
شيماء وخالد يوم الخطوبةشيكو النهاردة كانت زي القمر .. بجد احنا كلنا ذهلنا اول ماشفناها .. وحسينا بالدموع في عنينا .
شيكو خلاص .. فرحها النهاردة!!!
انا فاكرة اني يوم كتب كتابها اول اول امبارح احنا رحنا متأخرين فكانوا خلاص كتبوا الكتاب.. ففضيلنا في المسجد لحد ماصلينا المغرب ..
وكانت شيكو بتصلي ادامي ..
عيطت كتير اوي وانا بصلي ودعيتلها كتير اوي وانا ساجدة
حسيت انها اختي .. ودموعي ماكنتش عارفة مغزاها تحديدا .. حسيت انها مكس بين حاجات كتيرة اوي
بين اني فرحانة لشيكو جدا جدا
وبين اني زعلانة اني هروح البيت وماالاقيهاش وهي بتغلس علينا
وبين اني مش هلاقيها بتتصل بيا تقولي: انتوا عاملين ايه عالغدا يامنيلة ..
اقولها :يادي النيلة ,هو ايه التلاجوء دا , ماتحلو عن سمانا بقى
تقولي: انا راجعة من الشغل تعبانة وهاجي اكل عندكوا , اعملوا حسااااابي
وبين اني زعلانة جدا جدا جدا على زعل ايمان صحبتي
لان شيكو تبقى اخت ايمان الوحيدة ..
وايمان من اول ماشيماء اتخطبت وهي بتمر بأزمة نفسية عنيفة جدا خليتها في ساعات كتير تكره خالد ومش عايزة تشوفه ولا تسمع اسمه
لانه هياخد شيماء منها ..!
بس كل مرة لما تشوف شيماء فرحانة مع خالد, تحس ان دي خلاص .. سنة الحياة
خالد مابيحبش الصور المفاجأة:Dاحنا لسه راجعين من زفة العربيات من حوالي ساعة ونص ..
هي فرحها عائلي جدا .. اسرتها ,وأسرة خالد .. وعشاء رومانسي في وسط النيل
بس احنا يادوب سبناهم على طريق القاهرة
كانت زفة جامدة جدا جدا جدا .. واحلى حاجة لما وقفنا في وسط الشارع ونزلنا من العربيات واعدنا نغني .والمرور جه كان هيدينا مخالفات , بس الواسطة اتدخلت واحنا ماطولناش ..
واحلى واجمد حاجة واحنا زفينها على سلالم بيتها .. اتمختري ياحلوة يازينة .. وطالعة من بيت ابوها وكدا يعني
واحلى فيديو لما كنا في الاستديو معاها , وكل واحد قالها كلمة هنبقى نبعتهولها لما ترجع من شهر العسل
وياسلام على الكام صورة اللي اتصورناهم معاها في الاستديو .. كانوا جامدين جدا فعلا
بس احلى حاجة, لما شيماء خلصت وطلعتلنا , فقعدنا نتصور معاها في بيتها .. وانا صورتها صورة جامدة جدا وهي عاملة علامةvictory .. تخيلو بقى عروسة بطرحة وفستان ابيض وعاملة علامة النصر
وخالد بصراحة كان روش جدا جدا وهو بيشاورلنا من العربية بعلامة النصر هو كمان:D
خالد وشيماء ثنائي لذيذ جدا , طفولي جدا , ومرح جدا
يارب ربنا يسعدكوا .. توصلوا بالسلامة .. وتروحوا وترجعوا من شهر العسل بالسلامة .. وتعيشوا حياتكوا في سلام وهدوء طول العمر ..
اكيد الالازين مش هينسوا اليوم دا ..
وبالذات لما اسراء تعرف اللي حصل فيه .. احتمال تغير رأيها في حاجات مصيرية كتير :D:D
يللا
نشوفكوا الفرح الجاي بقى ..
عن قريب ياااااااااااااااااارب
شيماء وخالد بعد كتب الكتاب
No comments:
Post a Comment